Di ujung timur taniwel masi ada nafas yang memuji Tete Manis
Di ujung taniwel hidup jemaat Tuhan yang manis-manis dan gaga-gaga
Katong biasa bilang katong Jemaat Tuhan Uwen Gabungan
Katong Gabungan
Katong berbeda
Banyak warna
Banya suka deng tarsuka
Katong ada 5 negeri anak Nusa Ina
5 memang tetap 5
mar bukang jadi 5 yang tapisah
Dari langit turun kebumi
Inja kaki di atas tanah
Kasi tarus leluhur pung janji
Par anak cucu sabuah sabiji
Karna moyang-moyang dong biking peradaban for negeri-negeri
Beta uwen gabungan tetap badiri
Beta tetap masih barani
Biar kaki inja duri
Biar dong pele deng tirani
Katong orang bae-bae
Beta angka galas minong sopi
Bukang par biking kaco kampong
tapi
Par biking panas dada
La bacarita tampa garang
Angka hati for tetemanis pung sombar
Bataria Tongala pung nama
Bataria ina ama
Bataria Upu Lanite
Bataria Lante Takule
Tongala su ada
Tongala su lahir
Beta mandidi
Jang dong pele beta
Beta kabaresi for Tetemanis pung hari kajadiang
Katong rame-rame angka parang
Potong pameri tabiat biking orang hati tartado
Katong malintang salawaku lawang pembodohan, lawang biji ruku taratorang
Stop bakalae
Barenti baku potong
Barenti jalus antara tiris rumah
Tetemanis nanti manangis
Moyang-moyang susah hati
Lia anak cucu pung perbuatan malawang
Katong ana-ana kapala bakalae
Katong pung budaya bakalae
Katong kapala batu
Mar katong bukang batu
Ade deng kaka angka palungku baku tumbu
Pawela sampe padede
Malam bakalae
Siang su baku bae
Lalu baku kele deng aer mata
Uwen Pantai, Warloin, Tounusa, Solea, Mosuwey
Katong jadi satu dalam gabungan
Di rumah kasiang tete Manis Pung Maha Kuasa pung hari jadi
Mari katong Angka Palungku
Pikol Hahalang beban bersama
Dengan unjumawa
For jadi bae
Karena tetemanis su datang
Di Uwen Gabungan
Jang katong biking Antua Manangis Lai
Tagal katong pung kahidupan
***Pastori Jemaat GPM Uwen Gabungan, Kamis 19 Desember 2013, 08.00 Wit
*Maryo Indra Manjaruni,M.Cs
Panca Inderawimu Adalah 'Rahim' Pengetahuan 